Little things of late

little-things-of-late

* * *

"I eat here because the gravy is thick, and the waitresses call you by your first name. That's where it's at. It took me 80 years to realize it but it's where it's at."
Good (2020)

ከታክሲ ወርጄ ደጃፌ እስክደርስ ለአስር ደቂቃዎች ያህል መራመድ አለብኝ። በመንገዴ ብዙ ሱቆች፣ አንድ/ሁለት የህንጻ መሳሪያ መሸጫዎች፣ ሁለት እርጎ ቤቶች አና የተወሰኑ የመጠጥ ግሮሰሪዎችን አቋርጬ ቤቴ እገባለሁ። መቼ ለታ ያለወትሮዬ አምሽቼ ፈጠን ፈጠን እያልኩ ስራመድ አንድ ልጅ ፊት ለፊቴ መጥቶ ቆመ። ብዙ ተመክሬም ያልተወኝ መሬት መሬት እያዩ የመራመድ አመል አለብኝና የልጁን እግሮች ነው ቀድሜ ያየሁት። አንድ እርምጃ ወደኋላዬ መለስ ብዬ ቀና አልኩ። ልጁን በአይን አውቀዋለሁ። እውቀቴ ግን በመንገድ ሳልፍ አንድ ሁለቴ ሰላም ብሎኝ በአንገት ሰላምታ ምላሹን ከመስጠት የሚያልፍ ስላልሆነ በምሽት መንገዴን ዘግቶ ሲቆም ትንሽ ፈርቻለሁ።

"ደክሞኛል በናትህ አሳልፈኝ" አልኩኝ መፍራቴን እንዳያሳብቅ ደግሞም የተቆጣሁ እንዳይመስል ድምጼን ለመመጠን እየተጨነኩ።

"እሺ ትሄጃለሽ" አነጋገሩ የሰላም ይመስላል። የልብ ምቴ በጥቂቱ ተረጋጋች። 

"በሰላም ነው ጸጉርሽን የተቆረጥሽው?" አለ ቀጥሎ

"እ??" አልኩት ጥያቄው ያልጠበኩት ሆኖብኝ። ሴት ነኝና ደግሞም መሽቷልና ጭንቅላቴ ደስ የማይሉ ሃሳቦች ውስጥ ነበር። ከቀናት በፊት ድንገት ተነስቼ ሰለቆረጥኩት ጸጉሬ በዛ ቅጽበት ረስቻለሁ።  

"አይ ለቅሶ ምናምን ከሆነ ብዬ ነው . . . ማዘር ደህና ናቸው?"  ያልሆነ ነገር እየጠየቀ እንደሆነ ተሰምቶት ሳይሆን አይቀርም ንግግሩ ፈጠን ፈጠን አለ።

ሰፈሩ ጨለም ስለሚል ለወትሮው ካመሸሁ እናቴ ወይም ወንድሞቼ ወጥተው ይቀበሉኝ ነበር። ያን ቀን ስልኬ ዘግቶ ውጡልኝ ብዬ መደወያ አጥቼ ነበር ብቻዬን ለመግባት የወሰንኩት። እና ያ ልጅ  - ያ ፊቱ በፀሃይ የጠቆረ ፣ ጉንጮቹ በጉስቁልና የጎደጎዱ ፣ ጥርሶቹ በብዙ ሱሶች የበለዙ ፣ ትንፋሹ አልኮል አልኮል የሚል ፣ በኑሮው በቤቱ እልፍ ችግሮች ያሉበት የሃገሬ ልጅ የጸጉሬን ባጭር መቆረጥ ደግሞም ያለልማዴ ያለሸኚ መገኘቴን አይቶ "በሰላም ነው ወይ?" ብሎ ጠየቀኝ። መልሴን ሰምቶ ፣ ብዙም ወሬ ሳያበዛ የመጨረሻውን መጠጥ ቤት እስክናልፍ ድረስ ሸኝቶኝ ተሰናብቶኝ ተመለሰ። 

እዚያ ዘመድ አለ፡፡
ሁሉም የናት ልጅ ነው፤
ሁሉም ያባት ልጅ ነው፤
ጠላትም አንዳንዴ ይመጣል መቃብር፤
ባላጋራም ቸር ነው “ያገር ልጅ” ሲቸገር፡፡  
ሃገሬ (ገብረክርስቶስ ደስታ - መንገድ ስጡኝ ሰፊ)

'ቻዎ!' ብሎኝ ሲሄድ አይኖቼ እምባ ሞልተው ነበር። የሚያየኝ ሰው እንዳለ አላወኩም። ዝም ብዬ ስኖር የሚያስተውለኝ፣ በውስጡ በዝምታ የሚያስብልኝ እንዳለ አልተረዳሁም። 'ወገን መሃል መሆን ይሄ ነው!' አልኩ ለራሴ። It took me 28 years to realize it. But that's where it's at.

 "ሃገሬን እወዳታለሁ!" ብል  - ጋሽ ስብሃት እንዳለው ዛሬ ላይ 'የፋራ' ቢሆንም -  የማወራው ስለዚህ ልጅ ነው። ስሜን ሳያውቅ፣ ዘሬን ሳይቆጥር፣ ደረጃዬን ሳይለካ ስላሰበልኝ፣ ወገኑ ስላረገኝ ሰው ስል ሃገሬን እወዳታለሁ። ድምጽ ሰለሌላቸው መተያየቶቻችን ስል ሃገሬን እወዳታለሁ። ቃላት ስለማይባክንባቸው መግባባቶቻችን ስል ሃገሬን እወዳታለሁ። እኔ እዚህ ነኝ። ነፍሴ እዚህ ናት። ሰለድሎቿ የምኮራውን ያህል ስለነውሮቿም አንገቴን እደፋለሁ። በሟች ጎን ሆና የምታለቅሰው ልቤ በገዳይ ወገን ሆና ለይቅርታ ድንጋይ ትሸከማለች። ግን በሁሉም ውስጥ ሃገሬን እወዳታለሁ። ሞኝነትም ቢመስል ደጋግሜ እላለሁ ሃገር ስለተጎሳቆለች አትጠ፟ላም - ይልቅስ ስላልተወደደች ነው የተጎሳቆለችው። 

Comments (1)
No comments yet